LAOAG CITY – Naipasan ken naaprobaran ti City Ordinance No. 13 SP 2025-024 para iti pannakabukel ti Laoag City Development Council.
Segun ken Hon. Michael Christophe Agustin, daytoy a council ket isu ti mangputar iti agduduma a polisiya, mangaprobar ti 3-year sports plan, ken mangsigurado ti inclusivity saan laeng nga iti basketball ken volleyball no diket pakairamanan ti amin a klase ti ay-ayam wenno sports.
Gagem ti nasao nga ordinansa tapno ad-adda pay a mapapigsa ken mapaigetan ti koordinasyon iti nagduduma a programa iti benneg ti sports.
Patien na a babaen iti daytoy ket maaddaan iti komprehensibo nga sports plan ti ciudad; pannakaipaay iti agtultuloy a suporta kadagiti atleta ken coach babaen iti training opportunities; ken maipaisigurado ti transparency iti pannakausar ti pondo para iti sports.
Kuna ni Agustin a napanunutan na daytoy nga ordinansa tapno agbalin pay nga inclusive ti decision-making ii ciudad mainaig iti sports.
Innayon na a basar iti obserbasyon na ket adda dagiti gundaway a saan da a maim-impormaran kadagiti sports games, rason a dakkel a makatulong ti sports development council tapno adda da a mangipakaammo kadagiti aktibidad.
