LAOAG CITY – Naan-anayen a naaprobaran ti maysa nga ordinansa a mangipasigurado ti patas ken non-discriminatory issuance ti barangay clearance kadagiti amin a residente ditoy ciudad ti Laoag.
Segun iti nangisponsor iti ordinansa a ni Sanggunian Panlungsod Member Jeff Ericson Farinas, dakkel a makatulong daytoy kadagiti residente ditoy ciudad ti Laoag gapu ta masigurado a patas ti pannakatrato da.
Kunana a babaen iti nasao nga ordinansa ket naur-urnos iti sistema iti panagala ti barangay clearance ken dadduma pay a dokumento iti barangay.
Inbatad na a masapol a maliklikan iti saan a panagkikinaawatana maipaggep kadagitoy a banag.
Mainaig iti daytoy , kunana a ti panagserbi ti barangay ket masapol nga usto ken patas amin ti panangtrato kadagiti kabaranggayan.
Kabayatanna, mamati ni Farinas nga awanen dagiti agririri iti panagala kadagiti dokumento iti barangay ditoy ciudad ti Laoag kas ti barangay clearance.
