LAOAG CITY – Pormal a kiniddaw ti Office of the Solicitor General (OSG) iti Korte Suprema nga ibasura dagiti petision ni Sen. Ronald “Bato” dela Rosa a gagem a lappedan ti panangipatungpal ti arrest warrant ti International Criminal Court (ICC) kontra kenkuana.
Iti naisubmitir a komento ti Office of the Solicitor General para iti kaso a G.R. No. 278747, ginutigotna ti Korte Suprema nga ibasura ti Urgent Manifestation with Omnibus Motion ken Extremely Urgent Supplemental Manifestation with Motion ti senador gapu iti kinaawan ti umdas a pagibasaran wenno lack of merit.
Inkalintegan ti gobierno a mabalin a legal nga ipatungpal dagiti otoridad iti Pilipinas ti pammilin ti International Criminal Court uray awan ti bukud a warrant nga iparuk-at ti lokal a korte.
Insubmitir ti sungbat kalpasan nga inikkan ti Korte Suprema ti executive branch ti pagilian ti 72-hour non-extendible period tapno mangipeksa ti takderda.
Maipalagip a nagkiddaw ti tulong iti hudikatura ti kampo ni Dela Rosa tapno lappedan ti aniaman a panangarestar, panangibalud wenno panangisuko kenkuana kalpasan a kinumpirmaran ti International Criminal Court ti pannakaiparuk-at ti warrant mainaig iti imbestigasion iti “war on drugs” ti napalabas nga administrasion Duterte.
