LAOAG CITY – Inaprubaran ti senado iti maikatlo ken maudi a pannakaibasa ti nailungalong a gakat para iti pannakaestablisar ti Philippine Geriatric Center (PGC), maysa nga espesyal nga ospital tapno mapasayaat ti serbisyo ti salun-at dagiti senior citizens ditoy pagilian.
Ti gakat ket Senate Bill 1509 wenno Philippine Geriatric Center Act, nga inisponsoran ken inlungalong ni Sen. Risa Hontiveros.
Mangnamnama ni Hontiveros a mapagbalin a dagus a naan-anay a linteg, aglalo ket addan ti bersyon daytoy a naipasa iti kamara de representantes idi Disyembre 2025 ken maibilang a prayoridad ti Legislative Executive Development Advisory Council.
Karaman pay ditoy ti legislative agenda ti Department of Health (DOH).
Ti Philippine Geriatric Center ket agbalin a maysa nga espesyal nga ospital a mangipaay ti nalaka ken de-kalidad a serbisyo ti salun-at para kadagiti senior citizens.
Gagem pay daytoy a papigsaen ti nationwide geriatric health services, katulungan da ti Department of Health, dagiti lokal a gobierno ken dadduma pay a sektor.
Karaman pay iti mandato ti Philippine Geriatric Center ti panangilungalong ti panagsukisok kadagiti sakit nga adda ti pakainaigan ti panagtaeng, panagaramid kadagiti pagannurutan iti geriatric care, panangsuporta iti panagpatakder ti senior citizens’ wards kadagiti pampubliko nga ospital, ken panangipaay ti panagsanay kadagiti health worker, social worker, ken community volunteers.
Naipalaon pay iti nasao a gakat a masapol a ti mangidaulo ti Philippine Geriatric Center ket lisensiyado a doktor nga addaan ti umdas a kapadasan iti geriatric care ken panangiwanwan iti ospital.
