LAOAG CITY – Naglikudan ti Department of Education (DepEd) dagiti agwarwaras a post iti online a makaawat amin dagiti estudyante ti P1,000 a binolan nga allowance a maipagarop a mangrugin ita a bolan ti Hulyo.
Uray ti maysa pay a post a mangibagbaga a naimandar ti pannakaiyuswat ti linawas nga alcoholic test para iti amin a Junior ken Senior High school student.
Iti inparuk-at nga advisory ti Deprtment of Education, inbatad ti ahensiya a dagiti nasao a post ket nalawag a peke a damag.
Kagiddan iti daytoy, nagpalagip manen ti ahensya iti publiko nga agbalin a naannad ken tingitingen a naimbag dagiti impormasyon a maipopost online ken labanan ti fake news ken misinformation.
Rimuar dagiti peke a damag ken saan nga usto nga impormasyon, maysa a lawas kalpasan nga inpila ni Batangas Rep. Leandro Leviste ti House Bill 27 a gagem na a maipaayan ti P1,000 a binolan nga allowance dagiti estudyante a ti nasao a kantidad ket para iti makan, transportasyon ken dagiti mausar a kagamitan iti pagadalan.
