LAOAG CITY – Inbutaktak ni Batangas 1st District Rep. Leandro Legarda Leviste a maipagarup a makaawat ti insentibo dagiti miembro ti Kamara de Representantes apaman a ratipikaranen ti bicameral conference committee report iti 2026 national budget inton bigat, Disiembre 29.
Inbatad ni Leviste a P10 bilyon ti nakailatang para iti insentibo wenno bonus kadagiti kongresista nga alaen iti Maintenance and Other Operating Expenses ti Kamara.
Inlawlawagna nga usaren ti pundo ti Maintenance and Other Operating Expenses tapno masigurado a maaddaan ti quorum inton Lunes nangruna ket naibatog a dua nga aldaw sakbay ti bisperas ti baro a tawen no sadinno a naruay nga agpanpanday linteg ti nakabakasionen.
Kunana a saan a dumaldalan iti liquidation ti Maintenance and Other Operating Expenses no diket sertipikasion laeng kas ti ar-aramiden dagiti confidential fund.
Saan pay a masinunuo ni Leviste no mano ti agbalin nga insentibo ti tunggal kongresista.
Nupay kasta, immunan a nagkedked daytoy nga umawat ti agsina nga insentibo a maipagarup a dumanon iti P150 milyon a balor ti proyekto.
Awan pay ti rakurak ti liderato ti Kamara iti baro nga alegasion ni Rep. Leviste.
