LAOAG CITY – Agtultuloy ti imbestigasyon dagiti otoridad iti ili ti Badoc iti maipagarop a panangitaray dagiti dua a suspek ti 200 a ribo a pisos a koleksyon ti biktima iti paset ti Barangay Caraitan.
Segun iti Philippine National Police iti ili ti Badoc, ti biktima ket ni Mark Diculen Mariano, agtawen ti 39, ken residente iti 17, Tabug, Batac City, Ilocos Norte idinto a saan pay a nabigbig dagiti dua a suspek.
Iti inisyal nga imbestigasyon dagiti otoridad, kabayatan nga agsursurat iti resibo ti biktima ket adda ti nakamotorsiklo a dua nga indibidual ken maipagarop a tinutukan da daytoy iti paltog ken intaray da ti sling bag ti biktima a naglaon iti 200 a ribo a pisos a koleksyon na.
Inbatad ti pulisya a dagiti suspek ket naglugan iti nangisit a Mio motorcycle nga awanan ti plate number no sadinno ti driver ket nakasuot ti nangisit long-sleeve shirt idinto a ti kinalubbon na ket nagsuot ti nalabbaga a long-sleeve shirt, agpada nga addaan ti tube masks ken awanan ti helmet.
Kabayatanna, karaman iti imbestigasyon ti pulisya ket ti pannaka-review dagiti CCTV iti nasao a lugar.
