LAOAG CITY – Inpakammo ti Climate Change Commission a ti nagastos ti Department of Public Works and Highways para iti flood control projects idi 2025 ket P360 billion.
Ti datos ket inruwar ti budget sponsor a ni ACT-CIS party-list Rep. Edvic Yap kabayatan ti House plenary deliberations iti lungalong a P183 million budget para iti 2026 ti Climate Change Commission.
Iti panagsaludsod ni Kabataan Rep. Renee Co, kuna ni Yap a basar iti implementasyon ti Climate Change Commission iti Climate Change Expenditure Tagging Program, ti climate change expenses ti ahensya ket immabot iti P754 billion no sadinno 360 billion ket nausar para iti flood control projects.
Inlawlawag ni Yap a ti Climate Change Commission ket saan nga isu ti agplano no diket tagging laeng ti aramiden na ken daytoy ti naduktalan da.
Sinaludsod pay ni Co ti dakkel nga expenditure ti ahensya iti flood control projects, nangruna ket kontrobersyal ita ti nasao a banag gapo kadagiti sumagmamano nga opisyal ken kontraktor a maipagarop a nakaawat ti kickback.
Kuna pay ni Co a kayat da a masigurado nga adda dagiti maipatpatungpal a solusyon iti problema iti climate change nga adda iti babaen ti Climate Change Action Plan.
Insungbat met ni Yap a sigsiguradwen ti Climate Change Commission a compliance ti ahensya ken katulungan na ti Commission on Audit ken ti Department of Budget and Management.
