LAOAG CITY – Kinumpirmaran ti Malacañang a saan nga inparuk-at ni Presidente Ferdinand Marcos Jr. ti dumanon iti ₱60 billion agingga iti ₱80 billion a pundo para kadagiti sumagmamano nga infrastructure projects ti Department of Public Works and Highways iti babaen ti 2025 national budget.
Inbatad ni Palace Press Officer Claire Castro, dagitoy a proyekto ket inawagan nga “insertions” ti Kongreso basar iti report ti Department of Budget and Management.
Kunana a basar iti palawag ti Presidente, saan nga agpada ti Philippine Development Plan iti administrasionna isu a saanna nga inpalubos a mairuar ti pundo.
Immuna iti daytoy, kinumpirmaran ni Finance Secretary Ralph Recto iti budget briefing ti Development Budget Coordination Committee (DBCC) iti Kamara a saan a karaman iti prioridad ti administrasion dagiti nasao a proyekto.
Maipalagip a sakbay a pinirmaan ni Marcos ti 2025 General Appropriations Act (GAA) ket nangiwayat nga umuna isuna ti naiget a pannakatingiting iti pundo.
Kabayatanna, iti State of the Nation Address, nagballaag ti Presidente nakasagana daytoy nga i-veto ti 2026 national budget no saan nga agpada iti National Expenditure Program.
