LAOAG CITY – Nagpalawag ti State Weather Bureau a PAGASA kalpasan a binabalaw ni Senador Imee Marcos ti ahensia iti maipagarup a panagkurang daytoy iti nasapa a panangiparuk-at ti warnings a nagresulta iti pannakatay dagiti 150 a tattao iti kangitingitan iti iduduprak ti Bagyo Kristine ditoy pagilian.
Segun ken ni PAGASA Deputy Administrator for Research and Development Marcelino Villafuerte II, awatenda ti nagbalin a rakurak ti Senadora kas constructive criticism ken ar-aramidenda ti kabaelanda tapno ad-adda pay a napintas dagiti serbisio ken makaipaay ti naur-unos nga impormasion iti publiko.
Nupay kasta, inpetteng met ni Villafuerte a nasapa pay laeng, dua a lawas sakbay a sumrek iti Philippine Area of Responsibility ti posible a bagyo, irakrakurakda daytoyen iti publiko.
Malaksid iti daytoy, iramraman pay ti ahensiya ti weather advisory para iti manamnama a panagtudo a mabalin a mangitunda ti panaglayos wenno panagreggaay ti daga kadagiti lugar.
Immunan nga inbatad ni Senador Marcos idi Domingo no napakaammoan laeng a nasayaat ti PAGASA dagiti lokal a gobierno iti kinapigsa ti tudo gubuay iti bagyo, nakaibakwit koma a nasapa ken saan a natay dagiti naruay nga indibidual.
Kabayatanna, malaksid kadagiti pimmusay iti didigra, dimmanonen iti 143 nga indibidual ti nairekord a nasugatan idinto nga adda ti 20 nga indibidual pay ti naipadamag a mapukpukaw basar iti datos manipud iti National Disaster Risk Reduction and Management Office.
