LAOAG CITY – Inlawlawag ni Mr. Marvin Agustin, maysa nga agkaskasera iti Brgy. 1 ditoy siudad ti Laoag, ti pannakaibarot ti gate ti pagkaseraan a poon a nakisinnungbat kadagiti barangay tanod kalpasan a nalockdown da idi Mayo 6.
Kuna na a naamuan na laeng a naibarot manipud iti ruwar ti gate ti kasera da idi bigat ti Huebes gapu ta saan a maguyod ti maysa a kadua da nga agkaskasera ti nasao a gate.
Inbatad ni Agustin nga adda kuma ti alaen ti maseknan a maysa a supot ti bagas a lutuen na kabayatan a nakalockdown dagitoy.
Segun kenni Agustin, tinugtog na ti gate ken pinukkawan na dagiti agbanbantay a tanod nga adda iti bangir ti kalsada ken pina-ikkat na ti barot ken sinnungbat kadagiti maseknan.
Inbatad ni Agustin a ti palawag dagiti tanod ket isu iti inbilin ti DOH kadakuada, idinto a ti naibaga kenkuana dagiti kameng ti DOH ket mabalin da a makarwar nangruna no adda iti emerhensiya.
Mamati pay ni Agustin nga idi pay laeng rabii ti Mayo 6 a naibarot ti gate ti kasera da kalpasan a ti palawag dagiti tanod ket alas-siete ti bigat idi kalman nga adda da nga agbanbantay.
Kuna na a saan da kuma a naamuan a naibarot ti gate no saan a nangipaay ti ayuda ti kabagyan ti maseknan a kakaseraan na.
Inyarig ni Agustin iti napasamak kadakuada nga arig agigiyan da iti kulungan ti manok gapu ta nairot ti pannakaibarot ti gate ken nabayag pay sakbay a naikkat dagiti tanod daytoy.
Nailockdown ti pagkaseraan ni Agustin idi Mayo 6 gapu ti panag-isolate ti kakaseraan na, a pamilya ti maysa a kameng ti PNP San Nicolas a positibo iti COVID-19 idinto nga innemen nga aldaw nga awan iti kaserada ti maseknan.
Inpakaammo ni Barangay Kagawad Manny Morales, iti Brgy. 1 ditoy siudad ti Laoag, a naamuan na ti napasamak kada Mr. Marvin Agustin gapu ta inpost na daytoy iti social media ken inpadanun na iti group chat iti barangay.
Naluksaw ni Morales iti napasamak ken patyen na nga adda ti saan a panagkinnaawatan.
Kuna na a nagsarita da kenni Agustin iti immuna a gundaway ngem saan unay a nalawag ti sarita ti maseknan.
Segun kenni Morales, nangegan na ti palawag ni Agustin iti pannakiuman ti Bombo Radyo rason a tinawagan na ni Chief Tanod Allan Ancheta no siasinno ti kameng ti DOH a nangibaga a mabarutan ti gate ti nasao a pagkaseraan.
Inbatad na nga adda ti naibaga ni Ancheta a nagan ngem idi tinawagan ti City Health Office ket naglukidan ti maseknan.
Iti panagatultuloy ti panagduktal ni Morales, naamuan na a ti maipagarup a nangibaga ket ti contact tracer a naideploy iti barangay da.
Naamuan na manipud iti maseknan a saan a makikooperar dagiti adda iti kaseraan gapu ta nabayag nga ited a dagiti numero ti cellphone, saan da nga indeklara nga agkaskasera da ken adda pay ti naglibas a poon a nakapungtot ti nurse a kadua ti contact tracer.
Gapu iti panagpungtot ti maseknan ket naibaga na iti chief tanod a mailock wenno maikandado ti gate ti kaseraan idinto nga inbaga met ti contact tracer a mabalin a malukatan ti gate ken makaruar da no bilang adda ti emerhensya.
Inbatad ni Morales a kalpasan ti panagduty ti grupo ti chief tanod ket saan a naiyendorsar iti pannakabarut ti gate iti simmaruno a nagduty rason a napasamak ti panagririri.
Inadmitir ni Morales a pudno met dagiti nagbalin a puntos ni Agustin a saan da a makarwar a dagus no bilang adda iti emerhensiya iti dayta a kanito a nabarutan ti gate ti kasera da.
Nagkiddaw ti pammakawan ti kagawad babaen iti panangibagi na ti barangay iti naaramidanda ken agserbi a leksiyon kadakuada daytoy.
Innayon ni Morales a saanen a mailock ti gate ken maaddaan ti umiso a koordinasyon kadagiti sumaruno nga agbantay iti nasao a kaseraan.
