LAOAG CITY – Dakkel ti pammati ni Mrs. Clarita Taculog iti Sitio 6, Barangay 37, Calayab ditoy ciudad ti Laoag nga aggapo iti firing range ti bala a naglussok iti galba ken limsot iti water jag nga adda iti kusina ti pagtaengan ti anak na a ni James Taculog.
Segun kenni Mrs. Taculog, bayat nga agbuybuya dagiti annak na ket kellaat nga adda ti nanaltuog iti galba ken idi kitaen da ken nabuttawanen daytoy.
Malaksid iti daytoy, kuna pay ti ina a Taculog a natamaan ti kalub ti water jag ken ti nagdiswan ti bala ket asideg iti pagbuybuyaan dagiti annak na.
Nagyaman pay ni Taculog nga awan ti maysa kadagiti annak na iti kusina da gapo ta sakbay ti pasamak ket plano ti maseknan ti mapan aginnaw.
Mainaig iti daytoy, kunana nga apaman a naireport ti maysa a kagawad iti PNP ti pasamak ket dagus a nagturong dagiti otoridad, ken rumrumwar a kalibre 45 a paltog ti nausar.
Innayon na a saan a daytoy ti ummuna a pannakatama ti bala ti paltog ti pagtaengan da.
Immapela ti ina a maiyadayo wenno maipa-amyanan ti firing range tapno maliklikan a maulit ti pasamak ken awan ti matamaan ti maiwawa a bala nga aggapo iti firing range.
Kabayatanna, naipaiman iti Crime Laboratory ti INPPO ti narekobre a bala a timmama iti galba ti pagtaengan ti pamilya Taculog.
Daytoy ti inbatad ni Pol. Lt. Col. Amador Quicho, hepe ti PNP-Laoag.
Segun kenni Quicho, kalpasan ti pasamak ket dagus na a kinasarita ni Mr. Ryan Remigio, mangidadaulo ti Marcos Combat Shooters.
Kunana a basar iti palawag ni Remigo ket awan ti napasamak a combat shooting iti firing range gapo ta ti inyuswat da ket awarding para kadagiti nakipagpaset iti Bongbong Marcos Shooting Competition.
Nupay kasta, inpasingked ni Quicho a paimbestigar na latta ti nasao a pasamak.
