LAOAG CITY – Binalakadan ti Malacañang ni Vice President Sara Duterte nga iyunana pay laeng a sangoen ti bukud daytoy nga isyu sakbay a mangibato ti pammabalaw kontra ken ni Presidente Ferdinand Marcos Jr.
Daytoy ti nagbalin a reaksion ti Palasyo kalpasan nga inrakurak ti Bise Presidente a posible a maipagarup a nakaaramid ti impeachable offense ti Presidente gapu iti panangpirma iti national budget a segun kenkuana ket adda dagiti “blank pages” ken dagiti insertion.
Inbatad ni Palace Press Officer Claire Castro, nasaysayaat a tutukan pay laeng ti Bise Presidente dagiti kaso a sangsangoenna imbes a makibiang kadagiti isyu ti dadduma.
Mainaig pay iti rakurak ni Duterte a mabalin met nga agbalin a pangibasaran ti impeachment ti panagkedked ti maysa nga opisial a sungbatan dagiti saludsod maipanggep iti kabaelanna wenno dagiti alegasion ti panagusar ti ilegal a droga, kuna ni Castro a nasaysayaat a saludsuden daytoy ti Bise Presidente iti bagina ken ti amana a ni dati a Presidente Rodrigo Duterte.
Iti agdama, adda met ti sangsangoen nga impeachment complaint ni Vice President Duterte iti House of Representatives.
