LAOAG CITY – Kwinestionaran ni Palace Press Officer Undersecretary Claire Castro ti rakurak ni Vice President Sara Duterte a nadalus ti service record ken lehitimo ti naggapoan dagiti sanikuana.
Inbatad ni Castro, no awan ti nasken a pagdanagan ti Bise Presidente, apay saan daytoy a sumangsango iti panagdengngeg ti House Committee on Justice tapno sungbatan dagiti isyu a maibatbato kenkuana.
Inpettengna nga imbes nga agatendar iti panagdengngeg, ipilpilit ti kampo ni Duterte nga ipa-technical ken ipasardeng ti panagdengngeg.
Binabalaw pay ni Castro ti inwayat a press conference ti kampo ti Bise Presidente iti panangidaulo ni Michael Poa.
Kunana a nasaysayaat koma no iti panagdengngeg a sumango ni Duterte aglalo ket adda met ti abugadona a mabalin a mangbayabay kenkuana.
