LAOAG CITY – Kinumpirmaran ti Malakanyang a mapagsasaritaan payen ti pannakaipatungpal ti P20 iti kada kilo rice program ti gobierno iti Luzon ken Mindanao.
Daytoy ket kagiddan ti naikeddeng a pannakairubuat ti P20 rice inton bigat para iti Visayas kangrunaanna idiay Cebu.
Segun ken ni Palace Press Officer Atty. Claire Castro, karaman pay a nasken a maiplastar ket no kasano ti agbalin a sistema iti pannakaibaklay ti subsidiya mainaig kadagiti lokal a gobierno.
Inbatad ni Castro a daytoy ti rason no apay a maisayangkat idiay Visayas ti umuna a 20 a pisos iti kada kilo ti bagas gapu ta ti nasao nga area immuna a naala ti national government ti kooperasion maipanggep iti ambag dagiti Local Government Units iti subsidiya.
Kunana nga alisto nga immannugot dagiti opisial idiay Visayas nga isuda ket tumulong tapno maipatungpal ti nalaka a bagas para kadagiti umili.
Immunan nga inrakurak ti Palasyo a kalikagum ni Presidente Ferdinand Marcos Jr. nga agbalin a nalaka ti bagas para kadagiti Pilipino nangruna kadagiti marigrigat.
