LAOAG CITY – Nangipaay ti ababa a komento ni Presidente Ferdinand Marcos Jr. iti umuna a gundaway kontra kadagiti rakurak ti kabsatna a ni Senador Imee Marcos a maipagarup nga agus-usar isuna ti iligal a droga.
Segun iti Presidente, saanna koma a kayat nga iruar dagiti banag maipapan iti pamiliada ngem nabayagen a maob-obserbaranda ti dakkel a panagbalbaliw ti Senadora, maysa a banag a nakaalarmaan ti pamiliana ken nasisinged a pagayam.
Inlawlawagna a ti makitkita ti publiko iti telebision ket saanen a ti kabsatna nga am-ammona idi isu a madanaganda ti kasasaad ti Senadora.
Maipalagip a naminsan manen a bimmara ti kontrobersial idi nagsarita ni Sen. Imee iti anti-corruption rally ti Iglesia ni Cristo (INC).
Iti baet a saandan nga agsarsarita, mangnamnama ti Presidente nga agbalin a naurnosda nga agkabsat.
