LAOAG CITY – Maragsakan ti Senate Impeachment Court ken ti House prosecution team ti desision ti Supreme Court nga ibasura ti tallo a petision a mangkukwestion iti two-thirds voting threshold para iti impeachment trial ni Vice President Sara Duterte.
Segun ken ni impeachment court spokesperson Atty. Reggie Tongol, inbasura ti Korte Suprema dagiti petition da Victor Rodriguez, Berteni Causin ken Atty. Ernesto Francisco Jr. gapu iti kinaawan ti legal standing ken ti panagbalin a premature dagitoy.
Inpaganetget ni Tongol a pinatibker ti nagbalin a desision ti independence ti Senado kas maysa nga impeachment court.
Gapu iti daytoy, agtalinaed latta ti ruling idi Setiembre 23 no sadinno nagdesision ti korte a ti ‘all members of the Senate” ket maipanggep kadagiti senador a legal ken aktwal a makipaset iti panagbobotos.
Maipalagip a 13 Senador ti nagbotos a pabor iti panagbaliw ti interpresentasion iti 16-vote threshold kabayatan a maymaysa a nagkontra ket ni Presiding Officer Francis “Chiz” Escudero ken innem a Senador ti nag-abstain.
Kabayatanna, segun kada Bicol Saro Party-list Rep. Terry Ridon ken Akbayan Rep. Chel Diokno manipud House prosecution, naragsakda nga inawat ti desision gapu ta mangipaay daytoy ti nalawag a direksion para iti agtultuloy a panangusig.
Kuna pay da spokespersons Robert Ace Barbers ken Zia Alonto Adiong a makatulong ti ruling tapno maituloy ken makompleto ti prosecution ti presentasion dagiti ebidensiada ken panagsaludsod kadagiti testigo.
Inpetteng ni Ridon a masapul a maituloy ti proseso agingga iti pinal a panagdesision tapno ti mismo Senate Impeachment Court ti agdesision basar kadagiti ebidensia nga indasar kadagiti senator-judge.
