LAOAG CITY – Nagpalagip ti Department of Health kadagiti pet owners a liklikan ti panagbisong kadagiti taraken nga ayup kas ti aso ken pusa gapu iti peggad a mabalin a maala iti katay daytoy nupay bakunado dagitoy.
Inbatad ni Health Assistant Secretary ken spokesperson Albert Domingo a narisgo ti katay a maiyakar iti tao kas kadagiti karamot ken kagat gapu ta makaitunda daytoy iti makapatay a rabies.
Malaksid pay iti rabies, delikado met ti mikrobyo ti katay ti aso ken pusa.
Ti rabies ket addaan ti 100% fatality rate isu a napeggad ken nasken a saan nga ikankano.
Kunana a napateg a makita dagiti doktor wenno nurse iti animal bite center wenno kaasitgan nga ospital ti situasion tapno maammoan no kasapulan a maikkan ti post exposure prophylaxis wenno bakuna gapu ta ti sintomas daytoy ket mabalin a dumanon iti maysa a tawen sakbay a makita.
Iti datos ti Department of Health, addan ti 169 a kaso ti rabies ti nairekord ditoy pagilian agingga idi Mayo, 160 kadakuada ket pimmusay idinto nga am-ammoen pay laeng ti estado ti 9 a dadduma pay. Nangatnagto daytoy ti 13% iti 150 a kaso laeng a nairekord iti kapada a panawen idi 2023.
Kaadduan a kaso a nairekord ket idiay SOCCSKSARGEN sinaruno iti CALABARZON ken Bicol Region.
