LAOAG CITY – Inannugot ni Mr. Ricardo Tolentino, presidente ti Mango Growers Association ti rehiyon uno nga agprob-problema da kalpasan nga ad-adda pay a pinaigetan ti Philippine National Police (PNP) ti panaggatang ti potassium.
Daytoy ti us-usaren dagiti mango growers a pagpasuyot kadagiti mula a mangga tapno agsabong ken agbunga.
Segun ken ni Tolentino, dagiti gumatang ti potassium ket masapol a mangala ti lisensya ti camp crame.
Innayon na a nagpangta ti PNP a siasinno man a matiliwan nga agikot ti nasao a kemikal ket sumango ti kaso ken awan ti mairekomendar a pagpiyansa na.
Naamoan nga inaramid daytoy ti PNP gapu ta ti potassium nitrate ket maar-aramid a pagpabettak ken daytoy ti kayat a liklikan dagiti otoridad, kangrunaan na ket agtultuloy ti riribok idiay Mindano kangrunaan na ti Marawi City.
Innayon ni Tolentino nga iti agdama ket dagiti laeng naikkan ti lisensya manipod ti camp crame ti makagatang ti nasao a kemikal.
Mainaig ti daytoy, kuna ni Tolentino nga isuna pay laeng ti naikkan ti lisensya nga aglako ti potassium.
