LAOAG CITY – Nadagsen ti barukong ni Vice President Sara Duterte iti ipapanaw na iti opisina ti Department of Education, no sadinno nga apaman ti pormal a panagikkat na iti Gabinete ket inpettenga nga awan pakainaigan iti desisyon na ken ni First Lady Liza Araneta-Marcos.
Daytoy ti inbatad ni Duterte kalpasan ti nga in-turn over na iti baro a Department of Education Secretary Sonny Angara ti posisyon idiay Pasig City, idi laeng kalman, Hulyo 18, 2024
Mainaig iti daytoy, mangnamnama ni Duterte a mailippas amin ni Angara dagiti target ken gagem ti opisina nangruna ti pagsayaatan ti edukasyon.
Innayonna a nadagsen ti rikna na gapu ta saanna a nailippas ti takem na kas nadutokan a Department of Education secretary.
Ngem nu pay kasta inpetteng ti Bise Presidente, nga adda nadagsen a rason ti panagikkat na iti Gabinete ni President Ferdinand Marcos Jr. ngem ti desisyon na ket awan ti pakainaiganna ken ni First Lady Araneta-Marcos.
Kabayatanna, kagiddan ti panangawat ni Angara iti posisyon ken insigida met a nagikkat daytoy kas Senador.
Sakbay ti pannakadutok ni Angara kas Department of Education Secretary ket maipalagip nga agngudo kuma ti maikadwa a termino na kas senador inton 2025.
