LAOAG CITY – Balligi ti naiwayat nga opening ceremony ti 2024 Paris Olympics.
Daytoy ti inpaka-ammu ni Bombo International News Correspondent Ryan Cristobal kabayatan ti iya-atendar na iti nasao nga aktibidad.
Segun ken ni Cristobal, uray no nagtudo ti napigsa ket saan a nagbalin a lapped daytoy tapno saan a matuloy ti aktibidad.
Ti fluvial parade, wenno ti inawaganda a “Parade of the Nation” ket naangay iti Seine River agingga iti Notre Dame iti mismo sangu ti Eifel Tower, no sadinno a naglugan dagiti delegado iti 90 a bangka.
Pinasingkedanna pay a nagbalin a naragsak ti panaglukat ti 2024 Paris Olympics gapu ta nabuya ditoy ti singer a ni Lady Gaga ken Celine Dion.
Kunana nga arigna nagbalin a kasla konsierto ti intermission number gapu ta naruay a fans ti immatendar iti aktibidad.
Malaksid iti kinaragsak ti aktibidad, inbatad met ni Bombo International News Correspondent Dandreib Dancel a nagtalinaed a naiget ti monitoring dagiti otoridad iti panangipatungpal iti “NO QR CODE, NO ENTRY”.
Inpakammu na pay nga umabot iti 900 Euros agingga 2700 Euros ti VIP tickets.
Kabayatanna, mangnamnam ni Dancel a maiyawid manen ti team Pilipinas dagiti balitok a medalya.
Maipalagip a sakbay pay ti pormal a panaglukat ti ay-ayam ket addan dagiti immuna a laban a naiwayat, kas iti football.
