LAOAG CITY – Inbatad dagiti eksperto a ti panagsuot ti medyas iti rabii ket makatulong tapno al-alisto a makaturog ti maysa a tao.
Daytoy ket gapu ta ti panagbalin a warm dagiti saka a makatulong a mangpalukay kadagiti urat ti utek ket senyales iti utek a panawenen tapno maturog.
Inpakaammo pay dagiti eksperto a makatulong ti panagsuot ti medyas iti napinpintas a sirkulasyon ti dara, aglalo kadagiti tattao a masansan a makarikna ti lamiis kadagiti ima ken saka.
Innayon dagiti eksperto a ti naurnus a panagayos ti dara ket mangitunda iti naun-uneg ken naat-atiddog a pannaturog.
Mainaig iti daytoy, kadagiti addaan ti kondisyon kas ti Insomnia, mabalin a makatulong ti panagsuot ti medyas kas paset ti “sleep routine” tapno mapasayaat ti kalidad ti panaginana.
Nupay kasta, nagpalagip dagiti eksperto a siguradwen a nadalos ken saan a nailet ti medyas nga usaren tapno maliklikan ti iritasyon iti kudil wenno lapped iti naurnus a sirkulasyon.
