LAOAG CITY – Naipasardengen ti panagsupli ti chewing gum kadagiti nagduduma a rides iti carnaval ditoy ciudad ti Laoag.
Daytoy ket kalpasan nga inawagan ni Mr. Dominador Alberto, Senior Trade and Industry Specialist ti Department of Trade and Industry (DTI) ditoy Ilocos Norte ti Treasury Office nga idadaulwan ni Mr. Deomedes Gayban tapno idanun ti nasao nga isyu.
Inlawlawag ni Alberto nga ado dagiti nakita na a post iti social media maipanggep iti panagsupli ti chewing gum kadagiti nagduduma a rides iti carnaval.
Gapu iti daytoy, indanun na a dagus daytoy a banag iti Treasury Office tapno maisardengen ti panagsupli dagiti maseknan ti chewing gum.
Innayon na a mabalin da ti agimbestigar ngem al-alisto no mismon a ti Treasury Office ti agtignay tapno pagsardengen na daytoy a mapaspasamak.
