LAOAG CITY – Adda ti subad dagiti sakripisyo ken panagrigat ti pamilya tapno makapagturpos.
Daytoy ti inbatad ni Ma’am Jacqueline Salvacion a taga ili ti Badoc kalpasan a nagun-od na ti Top 5 iti kalepleppas a March 2023 Licensure Examination for Professional Teachers-Elementary Level.
Segun ken ni Salvacion, napalaos ti ragsak ken panagyaman na iti namarsua iti baro a balligi iti biag na gapu ta addan ti supli ti amin a panagrigrigat na ken ti pamilia na.
Immuna ti daytoy, inpakaammo ni Salvacion a sakbay a nakaturpos iti panagadal kangrunaan iti pannakapasa na kas baro a mangisursuro ket ado dagiti nagbalin a karit kenkuana.
Inbatad na nga umuna ditoy ti pinansyal a problema nu sadino a narigat a maaddaan ti libro a kasapulan iti panagreview.
Kuna na a daytoy ket pakairamanan ti personal a problema iti pamilya da a nairana idi manarimaan ti review.
Nu pay kasta, inpetteng ni Salvacion nga imbes nga agbalin a lapped dagiti pannubok a napasaran na ket daytoy ti ad-adda a nangitunda iti panagpursige na.
Kabayatanna, inpakaammo ni Salvacion a saan a first priority ti kurso na nga edukasyon ngem idi sinerrek na daytoy ket naayatan ken intultuloy.
Ni Salvacion ket nagturpos a magna cum laude iti kurso a Bachelor of Elementary Education iti Mariano Marcos State University-College of Teacher Education.
