LAOAG CITY – Inlawlawag ni Dr. Alan Taylan, Internal Medicine ti St. Camillus De Lellis Hopistal a ti panagturog ket maysa kadagiti kapatgan para iti salun-at ti maysa a tao.
Segun kenkuana, babaen ti nasayaat a panagturog ket napintas ti panagtaray ti dara iti bagi ken agbalin a nasalun-at ti maysa nga indibidual.
Inbatadna a no saan a napintas ti panagturog ti maysa a tao ket maapektaran pay ti utek, puso, bara, naturalesa ken metabolism ti bagi pakairamanan ti mood.
Inlawlawagna a basar iti maysa a panagadal ket ti kurang a turog ket nangatngato ti risgona nga agkasakit kas ti hypertension, depression ken obesity.
Kunana a maysa kadagiti kangrunaan a rason no apay nga agkurkurang ti turog ti maysa a tao ket gapu iti kinarigat ti panagbiag ket kasapulanda nga agpuyat tapno laeng agtrabaho.
Mainaig iti daytoy, inpakaammo ni Dr. Taylan a no masansan a makapaspasar ti indibidual ti panagkurkurang ti turog ket al-alisto dagitoy a makaptan ti nagduduma a sakit.
Innayonna nga innem agingga walo nga oras ti kasayaatan nga oras iti panagturog ti maysa a tao ngem nakadepende daytoy iti oras ti panagtrabahoda iti maysa nga aldaw.
Immuna iti daytoy, adda ti rimmuar iti maysa a panagsukisok a maysa ti pagilian a Pilipinas ti makapaspasar ti nakurang a panagturog.
