LAOAG CITY – Sinuspenso ti FIFA ti soccer federation president ti Panama a ni Manuel Arias kalpasan nga inawaganna a nalukmeg ti maysa nga star player ti national team-da.
Gapu iti daytoy, mapawilan ni Arias nga imatonan ti Panamanian Football Federation nga am-ammo iti awag a Fepafut iti uneg ti innem a bulan.
Saan pay isuna a mabalin a makipaset kadagiti football practice ken dadduma pay nga aktibidad.
Basar iti opisial a report ti FIFA, napasamak ti body shaming comment kalpasan nga inawaganna a nalukmeg ni Panama women’s national team star player Marta Cox.
Saan a nagballigi ti nasao a team iti international tournament iti napalabas a tawen ken inbatad ni Cox a ti kadakkelan a problema ti koponan ket ti kinaawan ti umdas a pasilidad.
Dagus met a binabalaw ni Arias ken inawaganna ti star player kas nalukmeg, mabaybay-annan ti bagbagina ken saanen unay a makagaraw iti field.
Nangaramid ni Cox ti pakasaritaan ti Panama idi 2023 kalpasan a naiserrekna ti kaunaan a goal ti Panama iti Women’s World Cup.
