LAOAG CITY – Agtintinnulong ti Department of Health ken PhilHealth tapno maipababa ti gastosen iti liver transplant iti pagilian basar ken ni Health Secretary Ted Herbosa.
Inrakurak daytoy ni Herbosa kagiddan iti panangselebrar ti umuna nga anibersario ti joint liver transplant program ti The Medical City ken Rizal Medical Center idiay Pasig City.
Kunana nga ad-adalen ti Department of Health ken PhilHealth ti panangipaay ti agingga iti P2 milyon coverage para iti liver transplant iti babaen ti Z Benefits package a mangibakbaklay iti napaut a panagpaagas para iti nakakaro a sakit ken dadakkel nga operasion.
Kuna ti sekretario nga umab-abot iti sumurok-kumurang P5 milyon ti balor ti liver transplant iti pagilian isu a dakkel a tulong ti subsidiya tapno makissayan ti gastosen dagiti pasiente.
