LAOAG CITY – Inbatad ti PhilHealth a saklawenda a bayadan ti gastos dagiti pasiente a maibilang kas inpatients nga awan pay ti las-od 24 nga oras a na-admit iti ospital.
Kayatna a saoen ket bayadan ti PhilHealth dagiti gastos dagiti kuwalipikado a miembro ken dependents ti hospital services a nausarda bayat ti nabiit a panagtalinaed da iti ospital tapno makissayan ti gastos dagitoy.
Ngem nupay kasta, inlawlawag ni Dr. Adeline Mesina ti PhilHealth’s Benefits Development and Research Department a daytoy ket saan a baro a benefit package nga addaan ti separate benefit rate. Daytoy ket kapada ti PhilHealth coverage para kadagiti emergency room services.
Innayonna a maiyaplikar laeng ti benepisio no ti pasiente ket awan pay 24 nga oras a na-admit gapu ta kasapulanna ti maiyakar iti sabali nga ospital wenno pasilidad para iti agtultuloy a pannakataming daytoy.
