LAOAG CITY – Naminsan manen a nangisayangkat ti tignay-protesta iti Korte Suprema dagiti drivers ken operators nga agpapada a miembro kadagiti transport groups a Pagkakaisa ng mga Samahan ng Tsuper at Opereytor Nationwide ken Manibela tapno kiddawen ti temporary restraining order kontra iti Public Utility Vehicle Modernization Program.
Ti protesta ket inaramid ti grupo kas maudi a tignay kagiddan ti rakurak ni Land Transportation Franchising and Regulatory Board Chairperson Teofilo Guadiz nga inton bigat, Mayo 16 ket rugianen dagiti otoridad nga agtiliw kadagiti kolorum a jeepneys a napaay a naka-consolidate ti prangkisa agingga idi Abril 30.
Nagkiddaw met ni Manibela President Mar Valbuena iti Korte Suprema a mangituding ti oral arguments tapno maikkanda ti gundaway a maipakita dagiti takderda kontra iti Public Utility Vehicle Modernization Program.
Iti nagan dagiti jeepney drivers ken operators a maapektaran ti programa, agtultuloy met nga umap-apela ni Valbuena ken ni Pres. Ferdinand Marcos, Jr. a denggen ti kiddawda.
Iti biang met ni Pagkakaisa ng mga Samahan ng Tsuper at Opereytor Nationwide Deputy Secretary General Bong Baylon, kunana a masapolen a masuspinde ti Public Utility Vehicle Modernization Program gapu ta adun dagiti nakapaneknek a ti nasao a programa ket palpak.
Immunan nga inrakurak ti gobierno a dagiti Public Utility Vehicle Modernization a saan a nag-aplay ti konsolidasion ket ikonsiderardan nga ilegal wenno kolorum ken saanen a mapalubusan pay nga agpasada.
Ballaag ti Land Transportation Franchising and Regulatory Board, dagiti kolorum a lugan ket i-impound-da ken ti operator daytoy ket mapatawan ti 50 ribu a pisos a multa.
