LAOAG CITY – Inrakurak ni Kristina Conti, Assistant to Counsel iti International Criminal Court a ti panawagan ti Prosecutors para kadagiti nayon a saksi iti drug war ni dati a Presidente Rodrigo Duterte ket mangipasimudaag a dumurdur-as ti proseso.
Kinontra ni Conti dagiti maibagbaga nga awan ti ebidensia kadagiti kaso kontra ken ni Duterte isut gapuna nga agpanpanawagan para iti nayon a testigo.
Inbatadna a naiget laeng iti panangtingiting ti International Criminal Court iti imbestigasion.
Immuna iti daytoy, binabalaw ti abugado ken kaalyado ni Duterte a ni Jimmy Bondoc ti panawagan iti Facebook page-na nga inawaganna daytoy a “crowdsourcing” ti International Criminal Court.
Inlawlawag pay ni Bondoc nga ita laeng nga agbirbuk ti testimonia ti testigo ti piskal.
Kuna met ni Nicholas Kaufman ti defense team ni Duterte a mamati isuna a saan a nasken nga ipublikar ti apela ngem inadmitirna nga obligado dagiti prosecutors nga ituloy ti imbestigasion.
