LAOAG CITY – Napintas a damag para ken ni ABC Federated President Elmer Faylogna iti ili ti Bangui ti nailungalong iti kamara de representantes a pannakaipaay ti fixed salary kadagiti opisyal ken agpapaay ti barangay iti intero a pagilyan.
Ti House Bill 502 ket inpila ni Davao Representative Paolo Duterte.
Immunan nga inpetteng ni Duterte a dagiti opisyal ti barangay ti umuna a pagtarayan dagiti residente isut gapu na a rumbeng laeng a maipaayan da ti fixed salary.
Inlawlawag ni Faylogna a ti sweldo dagiti agserserbi iti barangay ket 2,500 agingga iti 5 ribo a pisos no sadinno a gapu iti kumarkaro a kinarigat ti panagbiag ken agtultuloy a panagngato ti presyo dagiti kangrunaan a magatgatang ket saan a makaumanay daytoy.
Innayon na a panawenen tapno maipangato ti sweldo dagiti agserserbi ti barangay ken patien na nga ad-adda pay nga agtrabaho a nasayaat dagiti maseknan no maipaayan da ti fixed salary.
