LAOAG CITY – Plano ti gobierno a mangipasdek ti ad-adu pay a repacking facilities, tapno mapapartak ti pannakaipaay ti tulong kadagiti komunidad a maapektaran iti aniaman a didigra wenno kalamidad a sumrek ditoy Pilipinas.
Iti press briefing ti Malacañang, kinuna ni Department of Social Welfare and Development (DSWD) Secretary Rex Gatchalian nga iti babaen daytoy nga addang ket masigurado a ti tunggal Pilipino nga agkasapulan ket dagus a maipaayan iti kasapulan a tulong manipud iti gobierno.
Kinunana a kalikagom ti gobierno a maipaayan ti tulong dagiti nasusulinek a lugar, malaksid kadagiti regional, provincial, ken municipal warehouses, ket palawaen da pay dagiti maipasdek a repacking centers.
Iti agdama, ti gobierno ket addaan iti dua a repacking center, maysa idiay Pasay nga agserserbi a kas National Resource Operations Center, ken maysa idiay Cebu a mangipaay iti kasapulan ti Visayas ken Mindanao.
