LAOAG CITY – Inyalud-od ti Seoul Western District Court ti pannakaibalod ni impeached President Yoon Suk Yeol iti panagamak a mabalin a dadaelenna dagiti ebidensia kontra kenkuana nga adda ti pakainaiganna iti panangideklarana ti martial law idi Disiembre 2024.
Nupay kasta, naruay dagiti nakagura nangruna kadagiti supporters ti dati a Presidente ken nangibatida ti nadadael a tawa ken nadadael a ridaw iti building ti Korte nga isu ti naipasungad kadagiti otoridad kalpasan ti sumagmamano nga oras a pannakairakurak iti extended detention ni Yoon.
Naammoan a ginasut a pulis ti dagus a nagtignay iti nagbalin a protesta dagiti supporters ti dati a Presidente a nangibaga a maysa nga ‘unfolding situation’ ti nagbalin a panangraot dagitoy iti Korte.
Iti agdama, nagtalinaed iti Seoul Western District Court ni Yoon nga agtalinaed iti pasilidad ti kanayonan a 20 nga aldaw.
Kabayatanna, basar iti abugado ni Yoon a ni Atty. Seok Dong-hyeon, saan daytoy ti kalikagum ken kidkiddawen ti dati nga opisial.
Nagpalagip pay ti abugado kadagiti mangsupsuporta ken ni Yoon a saanen a pagbalinen a nakaro ti situasion gapu ta mabalin a makaapektar kadagiti future trials ti napadisi a Presidente.
