LAOAG CITY – Adalen ti hunta probinsial ti pannakailungalong ti ordinansa pakaseknan iti panangsolbar iti undernutrition iti ili ti Marcos.
Segun ken ni Senior Board Member Rafael Medina, daytoy ket babaen iti panangipaimana iti Committed on Social Welfare ken Committee on Education kas Lead tapno ditoy a maadal ti pagimbagan dagiti agad-adal pakaseknan iti pannakaitandudu ti pannangan ti nasusustansya a makan ken natnateng.
Inbatadna a manamnama nga adda ti maiyuswat a Municipal Feeding Program para kadagiti estudiante a maibilang nga undernourished iti Public Day Care wenno Early Childhood Care and Development para kadagiti kindergarten ken elementary schools tapno masolbar ti panagbisin wenno undernutrition iti ili ti Marcos.
Inlawlawagna a babaen iti daytoy ket maipasigurado nga agbalin a nasalun-at dagiti ubbing nangruna ket al-alisto dagitoy a makaptan wenno maakaran ti sakit.
Kunana a napintas daytoy nga addang ti Lokal a Gobierno tapno maikkan ti importansia dagiti ubbing kangrunaanna ti pannakapili dagiti makan nga ipauneg dagitoy.
Mangnamnama a maaprobaran daytoy tapno maiyalokaran ti pundo ti nasao a programa gapu ta pagsayaatan daytoy dagiti ubbing ken kas tulong ti panagadal dagitoy.
