LAOAG CITY – Naaprobaran iti maikadua a pannakaibasana ti Draft City Ordinance No. SP- 2025-005 wenno ti pannakaipaay ti prangkisa para kadagiti Tricycle-for-Hire ditoy siudad ti Laoag babaen ti Way of an Amnesty maibasar iti City Ordinance No. 2024-008, Series of 2024 (3rd Batch).
Indasar daytoy ti Chairman ti Committee on Transportation kabayatan ti regular session ti Sangguniang Panlungsod.
Segun kenkuana, daytoy ti maikatlo a bansada a pannakaipaay kadagiti residente ditoy siudad a nagilako wenno nangiyakar ti tricycle franchise-na.
Inbatadna nga adda ti 50 nga aplikante a nakakumpleto amin kadagiti dokumento a kasapulan tapno agbalin a kualipikado iti nasao nga ordinansa.
Inlawlawagna a daytoyen ti maudi a bansada a maikkan gapu ta adu dagiti requirements a naud-udi nga inpasa dagitoy.
Kunana a maikanniwas iti paglintegan ti panangilako dagiti franchise dagiti tricycle drivers.
Kabayatanna, mangnamnama a daytoyen ti maudi a mapasamak tapno saan met laeng a kakaasi dagiti tricycle driver ditoy siudad ti Laoag.
