LAOAG CITY – Kiniddaw ti National Unity Party (NUP) iti House Committee on Ethics and Privileges nga obligaren ni Cavite Fourth District Representative Kiko Barzaga a dumalan iti “comprehensive fitness determination” sakbay a makasubli daytoy iti trabaho.
Nakailanad daytoy iti Manifestation and Motion nga inpasa ti National Unity Party iti komite nga isu ti nangipila ti ethics complaint a nangibasaran iti 60 nga aldaw a pannakasuspenso ni Barzaga.
Gagem ti addang ti National Unity Party a maaddaan ti assessment no nakasaganan ni Barzaga nga aramiden ti responsibilidadna kas agpanpanday linteg iti aspeto a pisikal, emosyonal, mental ken talugading maiyallubog iti inkeddeng ti House Code of Conduct.
Naammoan a ti nangibasaran iti panagkiddaw ti National Unity Party ti agtultuloy a panag-post ni Barzaga iti social media dagiti makapaperdi a content iti baet ti inpataw a disciplinary sanctions ti Kamara.
Kabayatanna, ti kangrunaan nga inladawan ti National Unity Party ti social media post ni Barzaga kontra iti pimmusay nga Antipolo City Representative Romeo Acop kasta pay dagiti saan a napintas a komento nga adda ti pakainaiganna iti pulitika pakairamanan ti panagusar kadagiti babbai kadagiti rakurakna.
