LAOAG CITY – Inaprobaranen ti Sangguniang Panlungsod ti maikatlo ken maudi a pannakaibasana ti ordinansa a pannakaipalubos ti backride kadagiti tricycle driver ditoy siudad ti Laoag.
Ti Draft City Ordinance SP 2025-027 ket naipasa babaen ti 11 a butos nga awan ti negative vote ken nag-abstain.
Mainaig iti daytoy, basar iti Sangguniang Panlungsod a masapul a sumurot dagiti tricycle driver kadagiti naiyetnag a pagalagadan a naaramid para iti kinatalged dagiti pasahero dagitoy.
Maipalagip a rumbeng a dagiti tricycle driver ket addaan ti usto a footrest wenno armrest a pagkaptan dagiti ag-backride, sun cover wenno usto a linong ti likud, dagiti laeng agtawen ti 13 agpangato iti tawenna ti mabalin nga agian iti likud, agingga iti uppat nga indibidual ti mabalin nga ilugan dagitoy karamanen ti backride, addaan ti nalawag a silaw ken kasapulan nga agusar ti high visibility vest no rabii.
Kabayatanna, dumanon iti 200 a pisos ti multa dagiti saan a sumurot kadagitoy a pagganurotan.
