LAOAG CITY – Inaaprubaran ti Sangguniang Panlungsod iti siudad ti Batac iti maikatlo a pannakaibasa ti ordinansa a mangipangato ti singir iti plete kadagiti tricycle.
Segun ken ni Vice Mayor Atty. Windell Chua, babaen iti naaprubaran nga ordinansa ket P17.50 ti regular a plete para iti 1.5 a kilometro ken adda ti nayun a dua a pisos iti sumaruno a dua a kilometer agpangato.
Mainaig iti daytoy, inbatad na a 13 a pisos met ti plete iti umuna a 1.5 a kilometro para kadagiti estudyante idinto a 14 a pisos kadagiti senior citizen ken persons with disability.
Kuna na a maiyimplimentar met laeng ti dua a pisos a nayun a plete kadagitoy para iti sumaruno a dua a kilometro agpangato ngem adda ti diskwento a 20%.
Kabayatanna, inlawlawag ni Chua a nu dagiti pasahero ket adda iti grade school ket P11.50 laeng ti masingir a plete.
Innayun na nga iti laksid a naaprubaran iti baro a masingir iti plete ket manamnama a maiyurnos ti fare matrix iti siudad ti Batac nu sadino a maibinsa-binsa ti posible a diskwento iti tunggal kilometro a biyahe dagiti tricycle.
Immunan nga inpakaammo ni Chua a ti nagibasaran ti naaprubaran a plete nga addaan ti surok a sumagmamano a sentimos ket gapu iti manamnama a pannakaaplikar ti diskwento kadagiti pasahero.
