LAOAG CITY – Pinatibker ti ili ti San Ildefonso, Ilocos Sur ti kampanya kontra iti iligal a panaglako ti tobacco ken kadagiti vape products kalpasan a pannakaaprobar ti Municipal Ordinance No. 06-2026 idi Setiembre 2.
Ti baro nga ordinansa ket mangpatibker ti immununan nga executive order ni Mayor Amante “Tito” Purisima ken mangipaay daytoy ti permanente a sistema kontra ti panaglako, distribusion, transportasion, panagidulin ken panagikot kadagiti non-compliant wennu counterfeit tobacco ken vapor products.
Karaman iti nasao nga ordinansa dagiti produkto nga awan ti husto a government registration-na, internal revenue stamp, graphic health warning wenno ilakoda iti nababbaba ngem ti minimum price a nakailanad iti linteg.
Paigeten pay ti nasao a linteg ti local enforcement babaen ti regular a pannaka-inspect, panagkumpiskar kadagiti illicit products ken ti naigiget a koordinasion Bureau of Internal Revenue (BIR), Bureau of Customs, Philippine National Police (PNP), National Bureau of Investigation (NBI), Department of Trade and Industry (DTI) ken ti Food and Drug Administration (FDA).
Malaksid kadagitoy, karaman pay ditoy ti pannakaipaiget ti panangipataw ti pannusa kadagiti negosio, gapu ta masapolda ti sumurot iti anti-illicit trade requirements tapnu agtalinaed dagiti business permit-da.
Dagiti agsalungasing ket posible a masuspenso wenno ma-revoke ti permitda, ken bayat a dagiti dadakkel a kaso ket mabalin a mai-refer iti national agency.
Mangbuangay pay ti San Ildefonso ti Local Anti-Illicit Trade Task force tapno paigeten ti intelligence sharing, enforecement coordination ken training ti local personnel.
Karaman pay iti ordinansa ti registry dagiti violators, public information campaign, tinawen a pannaka-implementar ti report ken regular nga assessment ti anti-illicit trade efforts iti nasao nga ili.
Napateg ti nasao nga addang gapu ta strategic ti lokasion ti Ilocos Sur ken Region 1, nangruna ket lumawlawa ti sakupen ti illicit trade ditoy Luzon.
Mainaig iti daytoy, immununan a nangipatungpal ti Mariveles, Bataan ti anti-contraband executive order, iti met Caloocan City ket nangipila ti ordinansa a kabukbukodanda nga anti-illicit Tobacco trade ordinance.
