LAOAG CITY – Nagpanawagan ni Senator Ramon “Bong” Revilla Jr. a mapagsungbat no adda ti panagkurang a nangitunda ti pannakanarpuog ti Cabagan-Sta. Maria Bridge nga agbalor ti P1.2B idiay Isabela.
Manarimaan ti imbestigasion ti Department of Public Works and Highways (DPWH) ti insidente ken kunana a ti maikatlo nga span ti rangtay manipud iti Cabagan side ket narpuog kalpasan a dimmalyasat ti dump truck nga agdagsen ti 102 a tonelada.
Ginutigotna ti Department of Public Works and Highways a leppasenen ti imbestigasion ken iruar ti findings.
Nagpanawagan pay ti Senador para iti blacklisting ken panangdusa iti kontraktor pakairamanan dagiti inhinyero ti Department of Public Works and Highways a karaman iti panangimaton ti proyekto.
Nagkiddawen ti tulong ti Department of Public Works and Highways kadagiti eksperto manipud iti Bureau of Design and Bureau of Construction tapno mangiwayat ti evaluation ken assessment iti insidente.
Naiwayat ti initial retrofitting idi Marso 2023 tapno patibkeren ti rangtay kontra kadagiti ginggined.
Iti baet daytoy, nagbalin a kritikal ti situasion ti rangtay iti panagdalyasat ti dump truck a nakadagdagsen.
Maipalagip a narpuog ti P1.2 bilyon a balor ti Cabagan-Sta. Maria Bridge idiay Isabela idi Huebes ti rabii, Pebrero 27 a nangitunda iti pannakasugat kadagiti innem nga indibidual.
