LAOAG CITY – Awan pay ti madeterminar ti PNP-Badoc no ania ti motibo ken no siasinno ti makin-aramid ti pannakapapatay babaen iti pannakapaltopaltog na ken ni Joseph Taculog, addaan ti umno a tawen, awanan trabaho ken residente iti Brgy. Torre iti ili ti Currimao.
Daytoy ti inbatad ni P/C/Insp. Ryan Retutar Hepe ti Pulisya ti nasao nga ili.
Kuna na nga amin nga impormasyon a maala da kas iti rumrumuar a maipagrup a kina-hustler na iti sugal iti inipis ket mairaman ti agtultuloy nga imbestigasyon.
Nabigbig metten ti kinasiasino dagiti dua a nagdagas ken ni Taculog kasanguanan a napasamak ti nasao a pammaltog ngem nagkedkedan ni Retutar ti kinasiasinno dagitoy tapno saan a maapektaran ti imbestigasyon nga ipatpatungpal da.
Naamuan pay ti PNP-Badoc nga immuna a nakisugal da Taculog iti minatay iti Gabut Norte kalpasan na ket immakar da iti Bgy. Pagsanajan Sur nga idiay a napasamak ti pannakapaltog na.
Maipalagip a nagsagaba ti tallo a tama ti paltog ti biktima iti ulo ken iti tengged na babaen iti kalibre 45 a paltog maibasar iti kapsula ken buli ti nasao a klase ti paltog a narekubre iti nakapasamakan ti krimen.
