LAOAG CITY – Inbatad ni Fire Senior Inspector Edison Reyes, ti fire marshall iti Bureau of Fire Protection ditoy ciudad ti Laoag nga awan ti pagilasinan a nairanta ti pannakauram ti sanitary landfill ditoy ciudad ti Laoag idi malem ti sabado, Disyembre 13 ita a tawen.
Inlawlawag na a basar iti imbestigasyon, adda dagiti nakaibaga kadakuada a no tengnga ti aldaw ket adda ti mangngeg nga agputuk-putok kadagiti basura.
Kuna na a malaksid kadagiti butane ket adda pay dagiti naibelbelleng a baterya iti sanitary landfill ken dadduma pay a basura a mabalin nga isu ti nangrugyan ti apoy gapu iti panagbara dagitoy.
Inrakurak ni Reyes nga immabot iti nasurok a 12 nga oras sakbay a naan-anay a nasebseban da ti apoy iti sanitary landfill gapu ta umun-uneg ti apoy kadagiti napagsusukot a basura.
Innayon na a ti nakita da a nangrugyan ti apoy ket iti tengnga dagiti basura ket saan da a dagus a nasebseban ti apoy gapu ta nangato dagiti nakapenpen a basura.
Mainaig iti daytoy, kuna ni Reyes a kasapulan ti umiso a waste segregation tapno maliklikan ti possible a pannakauram manen iti sanitary landfill.
