LAOAG CITY – Inbatad ni Atty. Bernie Constantino, ti dati a Presidente ti Integrated Bar of the Philippines (IBP) ditoy probinsya a dakkel a reporma ti kasapulan iti judiciary sakbay a naan-anay a maipatungpal ti kalikagom ni senador Robin Padilla.
Ilunglungalong ni Senador Padilla a ti mausar kadagiti court hearings ken rulings ket ti lengguwahe a tagalong tapno ad-adda a maawatan ti kaadoan.
Inlawlawag ni Atty. Constantino a napintas no mausar ti tagalog a lengwahe kadagiti maiyuswat a panagdengngeg ken no adda ti agbalin a desisyon ti korte gapu ta iti kaadoan a Pilipino ket ad-ado dagiti saan a makaawat ken makasao ti ingles.
Nupay kasta, inbatad ti abogado nga iti biang da nga abogado ket marigatan da gapu ta adda dagiti legal terms nga ingles ti pannakaisao na a narigat a mai-tagalog.
Kuna na pay a ti sarita nga ingles ti nakairwaman dan gapu ta isu ti kangrunaan nga inus-usar da iti agad-adal da iti school of law.
Innayon na nga adda ti posibilidad na a maipatungpal ti kalikagom ni Senador Padilla ngem saan a kaskari na gapu ta ado paylaeng a proseso ti maaramid.
Mainaig iti daytoy, kuna na a no isuna ti masurot ket saanna koma a kayat a maipatungpal daytoy kadagitoy a panawen gapu ta malaksid nga ingles ti nakairwaman na ket atiddog pay a proseso ken marigatan da nga ag-adjust.
Inkalintegan na a ti maar-aramid iti agdama ket no saan a maawatan dagiti kliyente da ti ingles kabayatan ti panagdengngeg ken no addan ti desisyon ti korte ket mailawlawag kadakuada babaen iti panagusar da ti tagalong.
