LAOAG CITY – Umad-ado dagiti health experts a manggutgutigot iti publiko iti pannangan ti pruta iti bigat, ken maysa kadagiti kangrunaan nga irekrekomendar da ket ti papaya.
Basar kadagiti nutritionist, ti pannangan ti maysa a malukong a papaya apaman a makariing ti bigat ket dakkel ti maitulong na iti pakabuklan ti salun-at ti bagi ti maysa a tao.
Inlawlawag dagiti eksperto a ti papaya ket nabaknang iti enzyme a tumulong tapno al-alisto a matunaw dagiti ipauneg a taraon, isut gapuna a makissayan ti problema iti
constipation ken bloating.
Malaksid iti daytoy, ti papaya ket nabaknang pay iti vitamin C a mangpapigsa ti immune system.
Makatulong pay ti papaya iti panangpatalined a nasalun-at ti kudil gapu ta addaan daytoy ti antioxidants.
Kangrunaan ti amin, nababa ti calories ti papaya isut gapuna a napintas daytoy para kadagiti agkalikagom nga agkissay ti timbang.
