LAOAG CITY – Inbatad dagiti eksperto a ti pannangan ti pinya ket mabalin a makatulong kadagiti makapaspasar ti saan a komportable a sintomas iti panawen ti monthly period wenno panagregla ti maysa a babai.
Basar kadagiti panagadal, ti pinya ket nabaknang iti enzyme a maaw-awagan ti bromelain a mabigbig nga addaan ti anti-inflammatory properties.
Gapu iti daytoy, mabalin daytoy a makatulong iti panagkissay ti panaglitteg ken panagsakit ti pus-ong a masansan a mapaspasaran iti panawen ti menstruation.
Malaksid iti daytoy, addaan pay ti pineapple ti vitamin C a makatulong iti pannakapapigsa ti immune system ken panangipaay ti naganaygay a rikna.
Kuna dagiti eksperto a napateg daytoy aglalo no makapaspasar ti pannakabannog ken irritabilidad dagiti babbai kabayatan nga addaan ti monthly period.
Makatulong pay ti panagipauneg ti pinya iti panag-relx dagiti muscles iti matres, a mabalin a mangpababa ti intensity ti menstrual cramps.
Gapu iti daytoy, ad-adda a nalag-an ti rikna ti maysa a babai iti pakabuklan ti panagregla na.
Nupay kasta, inpalagip dagiti eksperto a masapol a saan a sobraan ti agipauneg laeng ti pinya gapu ta mabalin a mangitunda iti iritasyon ti buksit wenno allergic reactions iti sumagmamano nga indibidual.
