LAOAG CITY – Burburtiya para kenni Mr. Jayson Bulong iti ili ti Paoay no kasano a napuuran ti pantalon na nga inkabil na iti maysa a palanggana nga aluminom itay alas-nuebe ti bigat.
Segun kenni Bulong, kalpasan ti sumagmamano a minutos ket nadlaw na nga adda ti maur-uram ken idi kitaen na ti pantalon na ket nakita na ti asok a puraw ken arig na adda ti raya ti init a kumamang it pantalon na.
Inbatad na nga idi innala na a dagus ti pantalon na ket nakumpirmaran na nauram ket naabotanen daytoy.
Kunana a kalpasan daytoy ket insubli na ti pantalon na iti palanggana tapno kitaen no agapoy manen ngem napaay daytoy.
Saan met a maibaga ni Bulong no adda ti nangiranta a nangpuor iti pantalon na gapo ta agmaymaysa open air ti ayan na ken agmaymaysa daytoy.
Mainaig iti daytoy, kuna ni Bulong a gapo iti kinabara ti panawen ken ti palanggana nga aluminom ti mabalin a rason ti pannakapuur ti pantalon na.
Naamoan nga iti akin-kannawan a parte ti pantalon ti napuuran.
Kabayatanna, inlawlawag ni Miss Sharmaine Bonilla iti DOST-Pagasa ditoy ciudad ti Laoag dagiti possible a makagapu ti pannakauram ti maysa a pantalon a kukua ni Mr. Jayson Bulong iti ili ti Paoay.
Inbatad na a mabalin a gapu ti nabara a temperatura gapu ta iti laeng oras ti alas-nuebe itay bigat ket nairekord ti 31 degrees celcius.
Kunana nga ad-adda manen a bimmara gapu ta aluminom a palanggana ti nakaikabilan ti pantalon ken direkta pay iti init.
Innayon na nga adda dagiti tela nga alisto a makaala ti apoy.
