LAOAG CITY – Inrubuaten ni Maymay Entrata ti baro a dance-pop anthem nga inawaganna a Paradise.
Mabuya metten ti music video daytoy iti YouTube, tampok ti agduma a bersyon ti paraiso manipud iti dua a tao.
Ti Songwriter of the Year ti 2025 GRAMMY Awards a ni Amy Allen ti nangsurat ti kanta a nakatrabahonan ti adu nga international artists kas kada Sabrina Carpenter, Tate McRae ken Olivia Rodrigo.
Maipanggep ti Paradise iti journey ti maysa a tao manipud iti pannubok nga isalbar ti maysa a relasion agingga a naan-anay a panagibbat daytoy ken panangpili nga ad-adda nga ipateg ti bagi.
Naammoan a ni Maymay ti maysa kadagiti rising global acts ti Kapamilya Network nga adda iti likud ti viral hit nga Amakabogera a nagballigi kas Song of the Year iti LionhearTV RAWR Awards ken nakagun-od ti 10 million Spotify streams.
