LAOAG CITY – Inrakurak ti Department of Justice a planona a kiddawen ti pannakakanselar ti pasaporte ni Atty. Harry Roque.
Plano ti nasao nga ahensia a maipatungpal daytoy kagiddan dagiti isyu a sangsangoen ti dati a presidential spokesperson ni dati a Presidente Rodrigo Duterte nga adda idiay The Netherlands iti agdama.
Daytoy mismo ti inaramid a kumpirmasion ni Justice Secretary Jesus Crispin Remulla idi masaludsod maipanggep iti situasion ti kaso ni Atty. Harry Roque.
Ti nasao nga abugado ket agdama nga adda iruar ti Pilipinas kangrunaanna idiay The Netherlands no sadinno a nagkamang isuna iti gobierno daytoy para iti asylum application.
Mainaig iti daytoy, inburay ti sekretario ti Department of Justice a no bilang naan-anay a makanselar ti iggem a pasaporte ti dati a presidential spokesperson ket maibilang daytoy nga ‘undocumented alien.’
Naammoan a mangitunda daytoy ti ‘deportation’ ken ni Atty. Harry Roque ken mapasublin ditoy pagilian tapno sangoen dagiti kasona.
Inpettengna nga adda pay ti nakapenpen nga aplikasionna ti asylum iti nasao a pagilian isu a saan mabalin a basta laeng a maipa-deportar nga agsubli ditoy Pilipinas.
Kabayatanna, inadmitir ni Justice Secretary Remulla a ti proseso ti asylum ket kasapulan nga umuna a malpas sakbay a maarestar wenno naan-anay ng agsubli ditoy pagilian ni Atty. Roque.
