LAOAG CITY – Naipadalan a dagus iti booking process ni Kingdom of Jesus Christ Pastor Apollo Quiboloy, co-accused a nga isuda Jackielyn Roy, Ingrid Canada, Cresente Canada ken Sylvia Cemañes.
Naaramid ti panangala kadakuada ti fingerprints ken mug shots apaman a nakasangpet dagitoy iti Camp Crame, Quezon City.
Segun ken ni Philippine National police Spokesperson Col. Jean Fajardo, naalaan pay ti blood pressure da Quiboloy ken sumagmamano kadagitoy ket naamoan a nangato ti presyon na.
Immuna iti daytoy, iti oras ti alas-6:30 idi rabii ket nagbiyahe ti C-130 plane a nakailuganan da Quiboloy manipod iti Davao City ken nakadanun da iti oras ti alas-8:30 iti Villamor, ken garop alas-9:10 idi nakadanun da iti Custodial facility iti Camp Crame iti Quezon City.
Inpetteng ni Fajardo a ti isusuko da Quiboloy ket gapu iti joint effort ti Philippine National Police ken ti Armed Forced of the Philippines.
Inpakaammo ni Fajardo a napasamak daytoy iti oras ti alas-1:30 idi malem kalpasan a naaddaan ti negosasyon para iti naikapyaan nga isusuko da Quiboloy.
Innayon ni Fajardo a simmuko da Quiboloy iti mismo nga uneg ti compound ti Kingdom of Jesus Christ.
Ni Quiboloy ket sumangsango ti kaso seknan iti iti human trafficking ken child sexual abuse.
