LAOAG CITY – Inbatad ni National Bureau of Investigation (NBI) Director Melvin Matibag a nangiparuk-at ni Presidente Ferdinand Marcos Jr. ti direktiba kadagiti ahensya ti gobierno a siguradwen a patas ti panagtaray ti imbestigasyon ken pagsungbaten dagiti amin nga indibidual a mapaneknekan a nagbasol iti napasamak a tension iti senado no sadinno nga adda dagiti nagpapaputok ti paltog idi rabii ti Mayo 13.
Napasamak daytoy kalpasan nga adda dagiti report a maarestaren ni Senador Ronald “Bato” dela Rosa babaen ti bileg ti arrest warrant nga inparuk-at ti International Criminal Court (ICC).
Immunan nga inpetteng ni Matibag a responsibilidad ti senado nga ipasango ni dela Rosa gapu ta adda daytoy iti babaen ti protective custody da.
Nupa kasta, kuna na a no pudno man nga awanen ni Senador dela Risa iti uneg ti senado ket makapadismaya unay daytoy.
Segun pay ken ni Matibag, naliday ti nagresultaan ti pasamak gapu ta ninamnama da a marespetar ti saritaan da.
Mamati a kas maresrespetar nga opisyal, obligasyon dagiti senador a proyehiran saan laeng a dagiti kakadwa da no di ket uray dagiti agdama a maipatpatungpal a linteg ken ti Konstitusyon.
Inadmitir pay ni Matibag nga adda ti sentimyento dagiti ahente ti National Bureau of Investigation a possible a nairanta a naaramid laeng ti riribok iti senado tapno maikkan ti gundaway a makalibas ni dela Rosa.
Inpaganetget na a ti mandato da ket siguradwen a maarestar ti siasinno man nga addaan ti warrant of arrest, aglalo ket innem a bolan a naglemmeng ti senador sipud rimuar ti damag maipanggep iti arrest warrant manipod iti International Criminal Court.
Nupay kasta, ipabus-oyen ti National Bureau of Investigation iti Department of Justice (DOJ) ti sumaruno a desisyon ken ti panangipataw ti kaso gapu ta isuda ti kangrunaan nga ahensya a mangidadaulo iti nasao nga operasyon.
